إنتخابات - إنتخابات - إنتخــــــــــابات

( جحا يطوف المدينـــــــــة )
نزل جحا الشارع وقال لنفسه أمشي مع نفسي شوية يمكن دماغي تروووق من اللي أنا فيه ، فوجئ جحا إن الشارع إتغير خالص عن الإسبوع اللي فات ، قال يااااااااه هو أنا بقالي كتير كده مانزلتش واللا فيه إيه ؟
لفت نظر جحا في الشارع لافتات مُعلقة في كل مكان مكتوب عليها
أخوك فُلان ، وإبنكم فُلان ، وخادِمكُم فلان ، وأحاديث نبوية ، وأيات قُرآنية ، وتهاني بأعياد ومناسبات ، ورمضان كريم
جحا إفتكر قصة أهل الكهف وقال لنفسه أنا كُنت نايم واللا كنت ميت ؟ واللا الدنيا إتغيرت ؟ وهو موش داري بنفسه واحد قال له ياعم جحا الباشا فلان عازمك علي الفطار بكرة في الفيلا بتاعته جحا إستغرب وقال له أنا ؟ !!
قال له آه والله
رد جحا وقال هو يعرفني منين .
قال له الباشا يعرف الصغير والكبير في المدينة .
قال له جحا لو رحت الفيلا الخفير يرضي يدخلني .
قاله الباشا بنفسه هو اللي هايستقبلك
رد جحا وقال يمكن ربنا يكون كاتب لي أفطر مع باشا قبل ما أموت .
مشي جحا وقال هو الناس فاكرة إني مجنون ؟
ياعم باشا مين ؟ وفيلا مين ؟ وفطار إيه ؟
وهو ماشي زي المسحور قابله واحد راكب عربية نص نقل قاله ياجحا أنا كنت رايح لك البيت ، قاله خير إن شاء الله
قاله الباشا باعت لك الشنطة دي
قاله ليا أنا ؟ وفيها إيه ؟
قاله لحمة ، وبلح ، وجوز ، ولوز.
لقي الباشا غير الباشا . قال ياااااه ربنا يحنن قلوب البشوات علينا .
جحا يسأل نفسه ، فسمع صوت قرآن في أحد البيوت ، إستأنس بالقرآن واطمأن قلبه ودخل .
ياااااااه هو الواد محمد الفراش اللي في المدرسة مات ؟ لاحول ولاقوة إلا بالله ، دخل جحا لقي أكتر من 50 باشا في العزا
جحا تلفت يمينا وشمالا ويقول هو الواد محمد قبل مايموت خد الباشاوية ؟ هي الدنيا جري لها إيه ؟
وبعدين دول أكتر من 50 باشا !
ضحك جواه وقال الحمد لله يعني العزايم والشنط لسة كتييييييييير
رفع راسه لفوق وقال واللاه ياجحا 50 باشا حايقولوا لك كل سنة وإنت طيب ، ربنا يكتر البشاوات وكل سنة وأنا طيب مانا كمان باشا

[/size]