مصر عند المحامي (قضية خسرانة).
> مصر عند السباك (محتاجة جلدة) .
> مصر عند دكتور الأسنان (عايزة الخلع).
> مصر عند لعيب الكورة ( تسلل).
> مصر في قصص الحب (خاينة).
> مصر في السيما ( فيلم رعب).
> مصر في الأغاني (لحن مسروق).
> مصر في التاريخ ( قصة انتهت).
>
مصر في الجغرافيا ( خريطة ضايعة).
> مصر في الحساب ( ضرب وقسمة) .
> مصر عند دكتور النساء والتوليد (ولادة متعثرة وكمان قيصري).
> مصر عند دكتور الأنف والأذن والحنجرة (لا بتشم ولا بتسمع ولا حتي ليها صوت).
> مصر عند دكتور الرمد (بقت كفيفة).
> مصر في المسرح (ستارة بتتقفل).
> مصر في التليفزيون (تششششش).
> مصر في الروايات ( صفحة ضايعة).
> مصر بالنهار ( يوم ماطلعتلوش شمس).
> مصر بالليل ( ضلمة).
> مصر في الكمبيوتر (باد سيكتور).
> مصر ع النت ( موقع إباحي).
> مصر في التليفون (مشغولة).
> مصر عند الشعراء (مش موزونة).
> مصر في المكتبة ( مستعارة)
> مصر في المترو (عطلانة)
> مصر في رسايل الدكتوراة (مرجع سابق).
> مصر في الجامعة (ض.ج).
> مصر عند المقاولين (خازوق).
> مصر في الكهرباء (سلك عريان).
> مصر ف أي حيطة (خابور).
> مصر في الإشارة (حمرا).
> مصر ف الجنة (الحور العين).
> مصر ف جهنم ( الزبانية).
> مصر في الشارع (بلاعة مفتوحة).
> مصر في العربية (شرقانة).
> مصر في عود القصب (زعزوعة).
> مصر في الأجزاخانة (لبوس لابد منه).
> مصر في ملامحي (لون قمحي وتعويرة).
> مصر في الصلاة (ساجدة).
> مصر عند النجار (كماشة).
> مصر ف وش ابني (ابتسامة) .
> مصر عند الجزار (دبيحة).
> مصر في المواصلات (مزنوقة).
> مصر ع الناصية ( بتتعاكس).
> مصر ع القهوة ( بتحاسب علي مشاريب غيرها).
> مصر في السوق (فرشة بتشيلها البلدية).
> مصر في الصلاة (صف أعوج).
> مصر في الفرح (رقاصة).
> مصر في العزاء (ندّابة).
> مصر عند الحزب الوطني ( صندوق انتخابات)
> مصر عند أحزاب المعارضة (تعذيب)
> مصر في السجن (حبس انفرادي).
> مصر في الصحافة (مانشيت بايخ).
> مصر بين الصحف (جرنان أصفر).
> مصر في المطعم (سلاطة).
> مصر علي باب الملجأ (لقيطة).
> مصر في السوبر ماركت (صابون سايل)
> مصر في الفرنة (عيش مسكع)
> مصر في الفاترينة (مانيكان وحشة بإيد واحدة).
> مصر بين الغسيل (مبقعة).
> مصر عند المكوجي (مكرمشة).
> مصر بين الأدوية (مرة).
> مصر من البلكونة (واقفة تحت).
> مصر في الجنينة (شوكة ف وردة دبلانة)
> مصر في السيرك ( بلياتشو).
> مصر تحت الكوبري (بتشم كولّة).
> مصر عند الحلاق (موطية).
> مصر ف محل اللبس (بواقي وفضل).
> مصر عند الميكانيكي (محتاجة عفشة).
> مصر في المدرسة (متذنبة ووشها في الحيط)
> مصر عند العجلاتي (عايزة النفخ).
> مصر اللي مهما اقول فيها بموت فيها بس هي تحس.مصر اللي ادعي عليها واكره اللي يقول آمين.مصر اللي في غرفة الإنعاش محتاجة قبلة حياة بس إحنا بطلنا نبوس..علي من يجد مصر الاتصال ب0900، وعلي من لا يجدها أن يسأل عليها المفتش كرومبو قبل أن يتم اعتقاله بتهمة البحث عن بلد تايهة ومسروقة يا ولاد الحلال.
بره الموضوع: شكراً للمهندس عقيل بشير رئيس مجلس إدارة الشركة المصرية للاتصالات علي كونه رجلاً محترماً في زمن عز فيه الاحترام، وشكراً كذلك للمهندس عرفة الحوفي علي معاونته الصادقة لكل صاحب شكوي حقيقية.. مصر بخير.
الأربعاء 05 أغسطس 2009, 10:52 pm